എന്നും നിൻ വാടാമലർ

നഷ്ടസ്വപ്‌നങ്ങൾ കുതിർത്തൊരാ രാവിലെൻ 

കൺകോണിലായിരം വർണ്ണങ്ങൾ വിതറിയ ശലഭമേ...

വർണ്ണങ്ങൾ നരയുടെ കയ്പ്പുനീർ ചൂടാതെ 

നിന്നെയെൻ മാറിൽ അണച്ചിടട്ടെ.

ആയിരം ജ്വാലകൾ എരിയുന്ന മനസ്സിനുൾ-

ക്കുളിരായ് നീ മാറിയെങ്കിൽ...

മൂടുപടം തീർത്തൊരീ അട്ടഹാസങ്ങളിൽ 

നേരിൻ നറുപുഞ്ചിരിയായ് നീ മാറിയെങ്കിൽ...

ചൂടട്ടെ ഞാനീ വാടാമലരിതൾ എൻ മുടിയിഴകളിൽ 

എന്നും നിൻ സ്നേഹമായ്.

കാലങ്ങൾ പണിതീർത്ത കോലങ്ങൾ മാറട്ടെ

മാറ്റത്തിൻ ധ്വനികളിൽ ലോകം ചിരിക്കട്ടെ.

ആ ധ്വനികളെൻ കാതിൽ നിൻ 

സ്നേഹമായ് വിടർന്നെങ്കിൽ

അന്നു ഞാൻ മാറിടാം; 

നിൻ മാറിൽ മയങ്ങുമൊരു വാടാമലരായ്...